آراء العلماء                الفهرس                السيرة الذاتية

 

مقال جريدة وشوشة عن الدكتور أسامة السعداوي

  بتاريخ 20 أغسطس 2008م

كتب الأستاذ محمود عبد الحكيم ..

الملك خوفو اسمه الحقيقي «غنيم»..وحتشبسوت اسمها «إجلال».. وتوت عنخ آمون اسمه «وليد» .. هذا ما أكده لنا الدكتور أسامة السعداوي صاحب نظرية السعداوي للهيروغليفية الصحيحة، والذي أكد أن شامبليون أخطأ التوفيق في فك رموز حجر رشيد.

وغيرها من الاكتشافات المثيرة التي تحدث عنها السعداوي في هذا الحوار

 

< أنت واحد من كبار علماء القوات المسلحة المصرية وخريج الكلية الفنية العسكرية يعني ما فيش أي علاقة بين دراستك وبين الآثار .. ممكن نعرف الموضوع ابتدي معاك إزاي؟

- ده موضوع بحث يعني مالوش أي علاقة بالتخصص وكمان أنا واخد دبلومة في البحث العلمي وبعدين عاوز أقولك حاجة .. كل الاكتشافات العلمية الكبيرة أو 90% منها تمت بواسطة ناس غير مختصين أو بمعني آخر إن مجال دراستهم كان حاجة بس اكتشافاتهم كانت في حاجة تانية ..

والحكاية بدأت معايا وأنا طالب في الفنية العسكرية وكنت في الأقصر وبعدين وأنا واقف سألني سائح أمريكي وقال لي إيه إللي مكتوب عل الجدار ده؟ قلت له ما عرفش فقال لي مش عيب لما يبقي أجدادك سايبينلك رسالة وأنت مش عارف تقراها ..

فالموضوع قلب معايا بتحدي ومن سنة 1965 بدأت ألتحق بكل الفصول الخاصة بتعليم اللغة المصرية القديمة وطبعا كانت كلها بتتبع نظرية شامبليون، وبعد ما تعلمت اللغة المصرية القديمة جيبت النص إللي السائح الأمريكي سألني عليه وحاولت أقراه، معرفتش وبعدين سألت عن عالم مصريات كبير وقابلته وطلبت منه إنه يترجم النص لقيته بيقول كلام مالوش معني وعرفت إن فيه حاجة مش منطقية ولما أنهيت خدمتي في القوات المسلحة كان عندي الفرصة إني أبدأ دراستي الخاصة وجبت كل المراجع وذاكرتها وابتديت زي شامبليون ما بدأ وجمعت كل المراجع وقارنتها ببعضها.

< حضرتك بتفترض إن شامبليون ترجم حجر رشيد غلط .. هل معني كده إن العلماء ترجموا التاريخ المصري القديم علي أساس خاطئ؟

- أولا شامبليون يشكر علي محاولته لفك حجر رشيد، لكن الأدوات إللي استخدمها كانت ضعيفة وما كانش فيه التقدم التكنولوجي إللي موجود عندنا دلوقتي، وثانيا بالنسبة للدراسات والنظريات فمعظمها غلط لكنهم ترجموا حاجات صح علشان كده أنا قلت إن جدول شامبليون فيه 15 علامة صح .. وزي ما قلت أنا اتعلمت منهم يعني العلماء دول ليهم فضل عليّ وأنا بنيت نظرياتي من دراستهم.

< معني كلامك إن التاريخ الفرعوني الحالي تاريخ مزيف وأنت بتنادي بإعادة صياغة التاريخ المصري القديم؟

- أولا ما تقولش التاريخ الفرعوني قول التاريخ المصري القديم فهو فعلا مزيف وأنا نفسي أعيد صياغته من تاني وأحب أقولك إن 90% من الاكتشافات الأثرية تمت بطريق الصدفة يعني مثلا واحد ماشي خبط في حاجة في الأرض بعدها يحفر يكتشف إنها مقبرة.

< أنت لم تكتف بأنك أعدت صياغة اللغة المصرية القديمة ولكن أعدت صياغة النطق اللغوي لها .. هل هذا مهم؟

- طبعا مهم جدا، فأول سؤال بييجي علي دماغ الناس هو الفراعنة كانوا بيتكلموا إزاي وكنت تشوف في كل الأفلام يجيبلك الفراعنة بيقولوا أي كلام مالوش معني ويتمتموا بالكلام بشكل عبيط وأنا في الأول كنت فاكر إن دي مش مقصودة لكن اكتشفت إن دي محاولة مقصودة لتزييف وتشويه التاريخ المصري القديم ومحاولة إظهار المصريين القدماء في صورة غير حضارية.

< من ضمن اكتشافاتك إن الفراعنة كانوا بيتكلموا من 7 آلاف سنة زي ما احنا بنتكلم دلوقت .. طيب هل معقول إن فيه لغة في العالم تستمر 7 آلاف سنة دون أن تتعرض للتغيير؟

- قدماء المصريين كانوا بيتكلموا زي ما احنا بنتكلم وده لأن اللغة المصرية القديمة مكونة من المثاني زي كلمات «توتو - فوفو - ماما - بابا» ودي إللي بيتولد الطفل ويتكلمها في أي مكان في العالم، فالمثاني دي هي الفطرة إللي بيتكلم بيها الناس وبعد ما الطفل يكبر شوية  بياخد لغة أمه وأبوه والبيئة المحيطة به، يعني المثاني دي هيّ إللي بيتكلمها الأطفال في مختلف أنحاء العالم وهي في نفس الوقت أساس اللغة المصرية القديمة، يبقي إزاي هتتعرض للتغيير وهي أساسا مكونة من المثاني.

< علي السايت الخاص بك هناك صورة تقول عنها إن علماء اكتشفوها داخل كهف تحت سطح البحر في أستراليا لكلمة مصرية قديمة .. هل معني كلام حضرتك إن المصريين القدماء اكتشفوا إن أستراليا موجودة قبل أي حد تاني؟

- مش بس وصلوا أستراليا دول وصلوا كل قارات العالم وعلماء الأنثروبولوجي عارفين ده ومعترفين بيه وأينما تجد علامة الهرم تعلم إن المصريين القدماء كانوا هنا ولهم كتابات في أماكن كثيرة زي الأردن وسوريا وأنطاكية وعلشان تصدق كلامي هتلاقي إن الفضائية المصرية شالت علامة النسر وحطت بدالها علامة الهرم علشان عرفوا إن كلامي صح وإن معني كلمة هرم هي مصر.

< اكتشافاتك بتدل علي إن الحضارة المصرية القديمة كانت حضارة دينية ومؤمنة بالله وإن المصريين كانوا علي دين سيدنا إبراهيم .. بالرغم من إن علماء المصريات قالوا إنها حضارة وثنية؟

- قالوا إنها حضارة وثنية ومشركين وكفرة ودي كلها اتهامات باطلة لأنهم كانوا مؤمنين بالله وبيعبدوه يعني كانت حضارة دينية.

< أنت معروف جدا في أوروبا وتحظي بمكانة كبيرة هناك لكن في مصر مش واخد حقك .. إيه السبب؟

- أولا أنا لا أبحث عن الشهرة ولا أسعي إليها وأنا تاريخي العلمي والعملي والميداني معروف لجميع المثقفين في مصر والعالم العربي .. فأنا عاوز إيه أكثر من كده وأنا كان غرضي من الدراسات بتاعتي إني أوصل رسالة لأبناء شعبي .. كل قصدي منها إني أحافظ علي التاريخ المصري من التشويه.

 

----------------------